Urtarrilaren 24tik 26ra errezibitu ditugu Tolosako (Gipuzkoa) Laskorain ikastolako ikasleak Xalbadorren. Egunean zehar Xalbador eta Kanbon zehar tailer ezberdinetan parte hartu badute (ikus argazkiak), arratsetan Xalbador kolegioko 5.eko baten etxean lo egin dute, bakoitzak trukakide bat edo bi baitzituen.

Proiektu honen helburuak anitzak dira :

-Euskararen erabilpena indartzea eta hobetzea

-Beste euskalkien ezagutzea.

-Euskal Herriko ugaritasuna deskubritzea

-Iparralde eta Hegoaldearen arteko harremanak sustatzea.

-Jakin mina eta interesa piztea, ber adineko ikasleak elkartuz eta beren mundutik abiatuz, helburu, aktibitate eta hizkuntza amankomun baten inguruan.

Trukaketa honen bigarren partea Apirilaren 25etik 27ra iraganen da eta gure aldi izanen da Tolosara joatea !!

Tolosako truka kideak hor zirelarik, tailer ezberdinetan parte hartu dute gure ikasleek. Besteak beste kantu bat idatzi dute eta irratian grabatu beste elkarrizketa batzuekin (Gure Irratia) :

Tolosa Xalbador erreportaia

Elgarrizketa bakarrik

Xalbador Tolosa bertsuak

Goazen kantuaren nahasketa

     Abenduaren 18tik 22ra egin dugu Xalbador Kolegioan 2017-2018 ikasturteko IALA. Aurtengo proiektua “Kolegioan Lasaitasunez Loratu” izenburupean burutu da, bere helburu nagusia ikaste prozesuan ikaslearen ongi izateak duen garrantziaz gogoeta bat egitea izanik. Hori lantzeko abiapuntua Maslow-ren piramidea izan da, Abraham Maslow psikologo amerikarrak 1943an plazaratutako teoria baten ardatza dena. Honen arabera, pertsonen ongi izatea ziurtatzeko beharrezkoa da behar batzuk betetzea. Garrantziaren arabera, behar fisiologikoak (elikadura eta loa), askatasun eta segurtasun beharrak (babesa eta arauak), jendekidetasun beharrak (talde bateko kide sentitzea) eta autoerrealizaziorako beharrak (sorkuntza eta kontzentrazioa adibidez). Behar horietan oinarrituz, eta nerabezaroan fokalizatuz, ikasleek kolegio-denbora ahalik eta hoberen erreusitzeko itun bat prestatu behar izan dute, talde txikitan ahoz aurkeztu behar izan dutena.

     Aurtengo IALAk bi berritasun nagusi izan ditu. Alde batetik, kurtsoen ordez tailer desberdinak egin dituzte, ikasle bakoitzak 5, gutxienez behar mota desberdin bakoitzari dagokion bat. Tailerrek 2 oren eta 15 minutuko luzapena izan dute, irakasleek edo kanpoko pertsonek eman dituzte, eta bakoitzean 20-25 ikaslek parte hartu dute. Bestetik, ikasleak mailaka nahastu ditugu, hau da, tailerretan 3., 4., 5. eta 6. mailetako ikasleak nahasirik izan dira.

     Ikasleak IALAren gaian bete betean murgildu dira eta zentzua eman diote egin dutenari. Ikasleen ahozko aurkezpenak kalitate handikoak izan dira orokorrean, gogoeta interesgarriak eta sakonak egin dituztelarik. Aurtengo antolaketa bereziari dagokionez ere, orokorrean ikasleek begi onez ikusi dute, nahiz eta ainitzek onartu duten bitxi egin zaiela adin desberdinetako beste ikasleekin nahasturik egotea gelan.

     Gure aurtengo xedea, manera batez, burasoek IALA astean parte hartzea izan da. Ondorioz Komunikazio Ez Bortitza inguruko gaualdi bat antolatu dugu Arberoa ikastolako ekipa gomitatuz, hortan berezitua baita. XALBADOR kolegioan, ekiparen parte bat Komunikazio Ez Bortitzan formatzen ari da ere bai.

Abendoaren 7an, kolegioko 4.eko ikasleak, Durangoko azokara joan gara eguna pasatzera : Azoka, tailerrak, musika taldeak…

RAP TAILERRA :

Abenduaren 7an 4.eko ikasleak Durangoko azokara joan gara. Ikasleen eguna zen. Guk Ahotsenean RAP eta HIP HOP tailerra segitu dugu. La Basu eta Aneguria raplariek HIP HOP kultura aurkeztu digute: grafitiak, freestyle, break dantza eta popping “robotaren dantza”. “Battle” lehiaketak nola antolatzen diren ikusi dugu.

HIP HOPa gorputzaren mugimenduan oinarritzen da. RAPean aldiz ahotsa da baliabidea eta erritmo berezi batean hitzak inprobisatuz kantatzen dira. La Basu eta Aneguriak beat-box ahoarekin doinua egitea eta RAPero bakoitzak bere “flow” delakoa badaukala azaldu digute:

Artistaren nortasunaren arabera aldatzen da “flowa”. Hitzen eta melodiaren nahasketa da.

Momentu batez RAParen erritmoa jo dugu raperoak kantatzen laguntzeko:“Esan esan ozen ozen hemen gaude”. Bakoitzak bere historian mutikoz beztitu da mutikoek errespeta dezaten. Orain bere neska estiloa asumitzen du eta rapero neska bezala asumitzen da. RAP feministaren alde bat erakutsi digute. Esplikatu digute borrokatu direla neska bezala onartuak izateko musika mundu honetan.

“LIBURU BAT EGINGO DUT” tailerra :

Durangoko azokan tailer batean parte hartu dugu.

Maite Mutuberria ilustratzaileak liburu bat nola egiten zen azaldu digu, liburu bat egiteko prozesua zehaztuz.

Lehendabizi, liburuaren bilakaera denboran zehar aipatu digu. Hasieran harri eta egurretan egiten ziren, buztin taulatxoetan, papiroan, pergaminoan, paperean, inprentan, eta orain pantailetan.

Bigarrenik, liburu bat egiteko etapa ezberdinak zein diren esplikatu digu. Lehen etapa, testuarena da, ilustratzailea hautatu behar da, maketa, azala eta kontrazala ere. Bigarren etapa, diseinuarena da. Hirugarren etapa, inprimatzearena da, papera eta tintak hautatu behar dira, frogak, koadernatzea, azala eta baita matrikula ere egitekoa da. Azkenik, salmenta kudeatu behar da, dendetara ekarri eta promozio bideoa sortu.

Bukatzeko, gure liburuxka sortu dugu.

Orokorki, gustukoa izan dugu, nahiz eta ez dugun aski denborarik ukan gure liburuxka bukatzeko.

airakurri.com webgunean ere azalduak dira gauza gehienak.

    Kolegioko jolaslekuan mosaiko erraldoi bat eginez ospatu dugu Xalbadorren euskararen nazioarteko eguna, abenduaren 3a. Hirugarren mailako 30 bat ikaslek parte hartu dute antolaketan. Une goxo bat pasa genuen.

Igandea zen aurten abenduaren 3a, gure hizkuntzaren nazioarteko eguna, baina ez genuen, haatik, data hori oharkabean pasatzen utzi nahi. Ekimena hirugarren mailako ikasle multzo zabal baten ekimenez abiatu zen. Egun horren kari zerbait antolatzeko gogoa agertu zuten eta irakasleekin bildurik, ikastetxeko jolastokia baliatuz mosaiko aldarrikatzaile erraldoi bat egiteko ideia zertu zen.

Paperean lema diseinatu ondotik, astelehen eguerdian metroak eta igeltxoak eskuan hartu eta irudia lurrean markatzeari ekin genion eguzki epela lagun. Txirrina jotzerako prest zen mosaikoaren mapa: giltza baten irudia eta ondoan “gu” hitza. Hurrengo desafioa ikasle multzo bakoitza bere tokira ekarraraztea zen. Helburu hori erdiesteko 3.eko antolatzaile bakoitza LP gela batetik pasa zen, ekimenaren helburua eta ekimena bera azaltzeko, bai eta talde bakoitza bere lekura eramateko. 16:00etarako denok geure lekuan ginen. Prest argazkirako! Gora kaierak! Gora eskuak! Eseri orain! Irri eta algara artean une goxoa bizi izan genuen. Bukatzeko, nola ez, dantza. Ederra benetan.

Ez dezagula ahantz, euskarak aurrera egiteko gu gara giltza! Goza nazazu noiznahi! Bizi euskaraz!

Mila esker antolakuntzan ibili zareten ikasle eta irakasle guztiei.