LANBIDE FOROA

Xalbadorreko Hezkuntza Taldeak Lanbideen foroa antolatu zuen abenduaren 1ean, 1. aldikoz. Bilana oso baikorra da. Foroa arrakastatsua izan da, bai kopuruen aldetik, bai kualitatiboki.
Helburua zen familiei orientazioaz gogoetatzeko parada eskaintzea, eta toki berezi bat egitea lanbide heziketari, pentsatzen baitugu arlo hori oso interesgarria dela, baina jendartean aski irudi txarra duela.
50 bat profesionalek parte hartu zuen, arlo desberdinetakoak, eta oro har kontent agertu dira ideiarekin, bai eta ere antolaketarekin, eta gehienak berriz etortzeko prest dira (anitz gure ikasle ohiak edo gure burasoak ziren). Bihotzez eskertzen ditugu etortzeagatik !
140 bat familia etorri zen egun horretan (Xalbadorrekoak batez ere, baina Seaskako beste bigarren mailetakoak ere) ; galdetegia bete zutenek balorazio baikorra egiten zuten, proposamen batzuekin batera.
Irakasle batzuek ikasleei zuzendutako joko bat antolatu zuten, eta arrakastatsua izan zen (110 erantzun eta saristatu bat) ; jokoari esker errextu zen ikasleak profesionalengana joatea.
Antolaketa materiala egokia izan da (eskerrak laguntza eman duten guziei, ikasle, irakasle, Pesta Taldeko buraso), nahiz badiren hobetzeko puntuak.
Komunikazio mailan, Seaska mailan komunikatzeko hautua egin zen, foroa Euskaraz iragaiten zela segurtatzeko.
Geroari buruz, Seaska mailan gogoetatuko dugu ea foro hori urtero “itzulikatuz” behar denez antolatu. Gure Hezkuntza Taldea prest da heldu den urtean berriz antolatzeko. Arlo profesionalaren inguruan lanketa egitea garrantzitsua zaigu, bai eta ere Hego Euskal Herriko eskaintzaz informazioa ematea ere.
Ikus argazkiak, geziak klik eginez :


ERASMUS PLUS PROIEKTUA

Erromarako bidaia.

Gure ikastetxeak Erasmus Plus proiektu batean parte hartzeko aukera paregabekoa izan du. Europar Batasunak osoki diruztatzen duen proiektu honek Europako herri desberdinetan (Erroma, Italian – Serpa, Portugalen – Kaunas, Lituanian – Tonbridge, Inglaterran – Maltan ) kokatuak diren ikastetxeekin partzuergoa eskaintzen digu. Bi ikasturteen gainean plangintzatzen da eta 2020ko Maiatzan bukatuko da.

2018-ko Azaroaren 19tik 25ra, Xalbador ikastetxeko delegazio bat Erromara izan da. Laida Abadie Lafitte, Allande Etchelecu eta Lucie Bidegain ikasleek aste oso bat pasatu dute, Janire Ochoa eta Sylvie Cihigoyenetche, haien erakasleekin batera.

Aste honetan zehar, haien bikotekideen familien etxeetan egon dira. Goizetan, haiekin kurtseetara joaten ziren eta horrela, italiar kolegio batean zer bizi duten ikusi ahal izan dute. Arratsaldean zehar, proiektuaren gai nagusiari buruzko lanki ainitz plantan emanak izan dira: gure emozioak nola hobekiago kudeatzen ahal ditugun hobekiago ikasteko eta erakasteko. Proiektuari buruzko ikasleen lehen iritziekin egindako banderola bat sortua izan da ere. Banderola horrek ondotik herriz herri eta bidaiaz bidai, ikasleen itzulia eginen du.

Erran gabe doa, egin ditugun bisita guziak hango ekipak dituela denak antolatu, eta han ziren delegazio guziek, egunaz eta bai gauaz ere, Erromak eskaintzen ahal dituen altxor guziak deskubritzeko parada ukan dituztela: Piazza Novona, Piazza de Venice, Piazza di Spagna, Treviko iturria, Pantheoia, Koliseoa eta lur azpiko katakonbak besteak beste toki hauek dira denek ezagutzeko plazer ukan dutenak.

Koordinatzaile diren erakasleak lankidetza hau nola eraman behar den eta zer plangintzaren arabera definitu behar den (noiz izanen diren ondoko bidaiak, han artean eraman behar den lana zein izan behar den…), antolatzen lanean ari izan dira egunero aste horretan. Ondoko bidaia, Tonbridge-eko ikastetxean, Londreseko atarian, 2019ko Martxoaren 11tik 17ra iraganen da.

Ingelesa proiektu honen komunikatzeko hizkuntza denez, ingelesa lantzeko helburuan, ingeles kluba bat sortua izan da ondorioz. Talde hau astelehen guziz bazkari tenorean biltzen da. Emozioen gaiaren inguruan lanketa bat eramana da. Horretan ere, 2020-ean Euskal Herrira hurbildu behar zaizkigun delegazio guziak nola errezebituko ditugun maneraz ere hitzegiten dugu.

Ikasturte honen lehen zikloa Portugalean bukatuko da Maiatzan. Ondotik, Urrian beste ikasle multzo berri bat Lituaniara bidaliko dugu. Proiektu osoaren bukaera 2020ko Maiatzan izanen da Maltan.

Ikasleak baita ere erakasleak bizipen aberats batekin itzuli dira. Experientzia honen garatzeko lan harreman baita ere laguntasun lotura batzuk sortzen jakin izan dute.


XALBADOR kolegioko laugarrenak Durangoko azokatik Bilbo hirira.

Abenduaren 5an eta 6an,  XALBADOR kolegioko laugarrenek bi eguneko ateraldian parte hartu dute. Bizkaian barna ibili dira Durangoko azokatik Bilbora, Euskal kulturaren zati bat ezagutzeko asmoz. Gaualdia Leioan pasa dute, Bilbo hiriaren ondoan, Betiko Ikastolakoek gonbidaturik.

Ikasleek, egunkari eta irrati saio batzuen bidez ateraldi honen berri ematen dute :

Irakurketa on !
Egunkaria

Irrati saioak :

DURANGOKO AZOKA Laida, Txomin eta Idoia

DURANGOKO AZOKA Lorea, June eta Oihan

DURANGOKO AZOKA Maixa, Lintza eta Saioa

IZARO kantaria Adela, Mikela eta Joana

HUNTZA taldea Roméo, Eneko eta Paul

ESNE BELTZA taldea Elaia, Maiana eta Amaia

BETIKO IKASTOLA Antton, Ekaitz eta Edgar

BILBO HIRI ZAHARRETIK HIRI BERRIRA Unai, Imanol eta Xan

 


EUSKOa Xalbadorren

Badu zenbait urte Xalbador kolegioa Euskoaren partaide egin zela, “Euskal Herri ekologiko, euskaldun eta solidario baten alde” lemarekin bat eginez. Euskoa erabiliz, tokiko trukaketei lehentasuna eman, ekonomiaren parte bat birtokiratu, eta euskararen erabilpena eta lekua garatu nahi ditugu.Gauza guti egin dugu orain arte, alta potentzial handia dugu : 253 familia, eta gure hornitzaileetan Euskoa erabiltzen duten hainbat enpresa.
Administrazio Kontseiluan Euskoaren erabilpena garatzea erabaki da : helburuak finkatu, burasoak sentsibilizatu eta Euskotan ordaintzera bultzatu. Lehen urratsa familia bakoitza Eusko elkartearen kide egitea da, eta Euskokarta lortzea. Erraza da, lotura honetan egin beharreko guztia aurkituko duzu, 5 minututan : http://www.euskalmoneta.org/devenir-membre/ . Kide egiteak 12 € kostatzen du.
Kideek Xalbador kolegioa izenda dezakete elkarte lagun gisa, eta horrela, 6 hilabetero erabilitako Eusko kopuruaren %3a kolegioarentzat izanen da. Horretarako 30 kidek behar gaituzte elkarte lagun gisa izendatu. Ondotik, elkarteak, dohaintza moduan, erabili dituzuen euskoen %3a jasoko du. Lagun bakoitzak, hilabetean 50 euro (edo 100 euro) trukatzen baditu, kolegioa finantzatzeko diru iturri osagarri garrantzitsu bat izan daiteke, eta gainera ez die gurasoei ez denboraren aldetik ez eta diruaren aldetik lanik gehitzen ! Euroak euskotan trukatu behar dira, besterik ez, eta eusko sarean diren saltegietan erabili (http://www.euskalmoneta.org/1500-2/).
Ondoko urratsak izanen dira ordainketak Euskotan egiteko prozedurak azaltzea eta erraztea (kotizazioak eta beste).
Anartean, abenduaren 8ko zurkaizgoan Eusko elkartekoek mahai bat atxikiko dute. Kide egiten ahalko zarete, eta Euskokarta sortu.


“ITURRI ZAHARRETIK UR BERRIA” IALA

“Iturri zaharretik
edaten dut,
ur berria edaten,
ur berria edaten,
beti berri den ura,
betiko iturri zaharretik,
beti berri den ura.
Iturri zaharretik edaten dut. ”
J. Artze

Iruditzen zaigu urruna
Gure buruan da lurruna
“Beharba noizbait entzuna”
“Ez da oso ezaguna”
Kantu zaharrentzat ezezkoa zen
beti gure erantzuna
Baina heldu da garai berri bat
ezagutzeko eguna
Beraz iturri zaharretik edan
eta handitu bilduma
Hain zuzen ere, hori delako
gure aberastasuna!

Bertsua : Irantzu IDOATE FUNOSAS

Olerki honen bidez irudikatu nahi izan dugu aurtengo lehen IALAren gaia. Aste honetan guk ere iturri zaharretik edan dugu. Gure iturri zaharra euskal kantagintza herrikoia izan da : aspaldiko kantu herrikoiak, baita XX. mendearen 60. eta 70. hamarkadetan sortutako kantu batzuk.
Ikusi dugu kantu zahar horiek iturriaren ur berria bezala direla : ondare bizia, gure kulturan ongi sustraituak eta belaunaldi guzienak. Atzokoak, egungoak eta biharkoak !
Kantu bakoitzaren historia eta ezaugarriak landu ditugu: egilea, kantaria, aipaturiko gaia(k), lemak, testuinguru historikoa, mezua (baldin bada), adierazten eta sortzen dituzten emozioak, haien garrantzia Euskal Herrian (jendeak nola errezibitu duen ? Bere eragina gizartean ?…)…

Zer da IALA ?
Ikasgaien Arteko Lan Astea :  aste batez usaiako ordutegia hankaz gora bota eta ikastetxe osoa gai baten inguruan “dantzan” ezartzen da.
Lehen 3 egunetan, irakasleek saioak prestatzen dituzte ikasgelentzat, bakoitzak bere arlotik gaia elikatzeko. Aukera baliatzen dugu kanpoko jendea ekar arazteko, gu ikastetxetik ateratzeko, egin molde berrien saiatzeko…
Azken 2 egunetan ikasleak zurkaitz taldean ezartzen dira, eta adinak nahasirik 4 edo 5eko taldetxoka lan bat egiten dute : ostegun goizean kontsigna ematen zaie, eta ostiral arratsaldez epai mahai baten aitzinean aurkeztu behar dute. Talde lana, kooperazioa, ahozkotasuna, sorkuntza ebaluatzen dira, eta bistan dena landu den gaiaren ezagutza.
Aste berezi horretan motibazio handia sortzen da ikastetxean eta momentu “magikoak” bizitzen ditugu.

Sorpresa harrigarria !
Azaroaren 6ean opari ederra ukan dugu : Mixel Ducau, Andde Duhalde, Niko Etxart, Peio Ospital, eta Watson kantariek bisita egin digute. Geletan ibili dira, ikasleekin mintzatzen, eta eguerditan kantaldia eskaini digute, 300 ikasleen aitzinean. Hau giroa ! Biharamunean Pantxix Bidart ere ikasleekin ibili da, eta ostegunean Zortzi taldearen kontzertua (Bixente Junca et Xanti Legarto). Bihotzetik eskertzen ditugu, haiei esker iturri zaharretik ur berria edaten segituko dugu !

Euskal Irratietako elkarrizketa hemen.

Ikus argazkiak gezian klikatuz :