Aurten hirugarren aldikoz gauzatzen dute Xalbador Kolegioko 5.eko ikasle-irakasleek Tolosako (Gipuzkoa) Laskorain ikastolarekiko trukaketa. Gure ikastetxea biziki atxikia da proiektu honi, garrantzi handiko helburuak baititu :
- Euskararen erabilpena indartu : adin berekoen artean euskaraz komunikatzea, hizkuntzaren garrantziaz ohartaraztea, eta erabilpenerako motibatzea.
- Euskal Herriaren ezagutza sakondu : gure herriaren beste eskualde bat ezagutzea, Euskal Herriaren aniztasuna agerian ezartzea (euskalkia, geografia, bizi modua, ekonomia….).
- Harremanak landu : beste ikastola bateko adin bereko gazteekin harremanak ukaitea, elkar ezagutzea, ongi pasatzea.
Tolosarrak gure ikastetxe eta etxeetara jin dira 2015eko urtarrilaren 14tik 16ra, asteazkenetik ostiralera. Eta ondotik, gu Tolosarat joanen gara martxoaren 25tik 27ra.
Ikasleak bikoteka emanak dira. Ikasturtean zehar, bikoteen elkar ezagutza internet bidez landua izan da : bakoitzaren aurkezpena, bakoitzaren ingurunea (herria, familia, bizimoldea…).
Aste honetan, lagun Tolosarrentzat eskola orduetan aktibitate desberdinak antolatuak izan dira, tailer moduan : pista jokoa, Kanbo herriaren ezagutza, trinketean pilotak eta sareak eskuz egitea, Yoseikan Budo, karaokea, marrazkia, bertsolaritza, irratigintza eta beste joko bat. Eskola orduetatik kanpo, ikasleak familien etxeetan egon dira, eta hango irakasleak gureekin ibili dira eskualdea ezagutzen .
Topaketa arraskastatsua izan da : Euskara sekula baino gehiago erabilia izan da, ikasleen elkar ezagutza gauzatu da, harreman politak egin dira, eta aroa lagun, hiru egun zoragarri pasatu ditugu. Ikasleak anitz inplikatu dira proiektuan, sorkuntza ederrak eginez eta arduraz jokatuz ; burasoak ere gogotik sartu dira jokoan. Aipamen berezia antolaketan buru belarri ibili diren irakasle arduradunei (Maite, Benoît eta Gillermo), eta laguntza eman duten guziei : Ellande, Jokin, Aritz, Jose, Naia, Gorka, Panpi, Leire, Ainhoa, Oier, Janire, beste irakasleak….
Orain Tolosarako bidaia berantetsia dugu. Ea martxoa fite heldu den !
Hemen atzemanen dituzue Euskal Irratiekin egin ditugun grabaketak :
Quizz 01 :
Quizz 02 :
Bertso 01 :
Bertso 02 :
Elkarrizketa :
